Sabi nila ang pagmamahal daw ay mapagpalaya

Ngunit paano kung isa akong ibong nakahawla?

Hindi ako malayang nakalilipad

Nakatali't mababa ang aking lipad

Hindi ito patungkol sa mga ibon

Patungkol ito sa mga nais na naipon 

Mga damdaming hindi naihayag

Dulot ng lipunang mapagmatyag

Kung tunay ngang malaya ang pagmamahal

Bakit tila ako'y nasasakal?

Bakit ako'y dinudusta't dinidikta?

Ito ba ang kahulugan ng malaya?

Ano naman kung kapareho ng kasarian?

Isa na ba akong maituturing na makasalanan?

Makasalanan na kung makasalanan

Pero ang puso, sinisigaw lamang nito ang katotohanan

Bakit ba hindi magawang tanggapin?

Bakit kailangang sansalain?

Hindi ito nababatay sa pagpili

Ang pagmamahal na alam ko ay walang pinipili

Babae man o lalaki ang ninanais

Malaya tayong magmahal nang labis 

Tandaang hindi limitado ang pag-ibig

Bagkus ito'y palaging mananaig